الرئيسية
ايميل وصلني حبيت انقله لكم
(برستيجي ما يسمح لي )
حصل موقفين حثوني بقوة انه اكتب هالتدوينة ..
الموقف الأول كنت طالعة من كافتيرية الجامعة وأشوف شلة بنات صغاار يتضاربون من تشيل الكيسة البلاستيك ..
وأحسهم متفشلات مرة من انهم يشيلون كيسة البلاستيك ..
ابتسمت والله تذكرت نفسي قبل 6 سنوات ..
كنت ما احب اشيل كيسة بلاستيك احسها تفشل ! وقال ايش قال برستيجي ما يسمح لي ..
ولا اذا مثلا أخذت شيء من مطعم ومعاه بيبسي ..! ما أشيل البيبسي لو تنطبق السما ع الأرض ..!
لو حناخذ تيك آوي ..مستحيل اتنازل واخذ التيك اوي بيديني الجميلة ..!
لو مثلا خلصت الكراسي ومافي مكان اجلس عليه الا الارض ….مستحيل المستحيلات اجلس (( أنا )) على الأرض ..احس اتفشل ..
والكعب ما يفارقني ! لو فين ما رحت ..مع اني اعتبر طويلة نوعا ما ومع ذلك الكعب هذا شيء اساسي ومستحيل اتنزل وألبس صندل فما بالكم بزنوبة لووول واخر شيء اللي له علاقة بالموقف الثاني هو المكاسرة لا يمكن اكاسر حتى لو اعرف انه ضاحك علي ولاعب على عقلي ..عادي احط السعر اللي يبي بس ما اكاسر !!
الموقف الثاني .. كنا في محل عبايات انا وامي …وأمي تبغى عباية سادة .. فجالسين نتناقش ع السعر ..قال 300 ..
قالت امي اشرايك .. قلت طبعا لأ ! ايش اللي عباية سادة وبـ 300 !
المهم جاب اعذار من تحت الارض ..القماشة ، الخياطة ..الخ
قلت اسمح لي انتا كذا خليتني اعيد التفكير في اني افصل عندكم ، هذا وهي سادة كذا ..انا ما ابي سادة كم بتحط!!
قال : (( اتركيكي من علم النفس ، اما انتي والله ما تفصلين عبايتك أقل من 500 !! *مع نظرة إستهزاء* ))
قلت وليه 500 ؟!
قال : (( برستيجك ما يسمح لك ))
قلت شفت العباية اللي علي مفصلتها بـ 180 وعارفة شغلكم اللي ع الأكمام تلاقيه كُلفة و الستراس اللي مغلينها ع الناس الكيسة منه بـ … جيت أكمل ابغى اقول 200 ريال لوول ..قال 80 ريال !!
قلت بالضبط ..لوول
اللي خلاني أفكر كلمة (( برستيجي ما يسمح لي )) ..!
يا الله قد ايش نضيع علينا اشياء حلوة عشان هالتفكير انا شخصيا كنت ممن يحمل هالتفكير ..ليه ؟! مممم يمكن غرور ، و يمكن شوفة نفس ، ويمكن احس هالاشياء تفشل الواحد ..
بينما كيسة بلاستيك ايش فيها شيء يفشل ..! و المكاسرة من حقك .. يعني صاحب محل العبايات شايفنا كذا برستيجنا ما يسمح لنا نفصل أقل من 500 فيقوم يزيد السعر ويقول حلال فيهم هما يبغون كذا ..
هل الشيء لو مبدأ ( الرخيص مخيس ) فعلا صحيح ؟! طيب القماشة ع مقاسك ما حتاخذ امتار كثيرة و كمان الكلفة او النقشة اللي تبغينها جاهزة اللهم يلصقونها وكان الله غفورا رحيما ..عندك كمان نوعية القماشة ممكن يحط لنا اي شيء لو احنا ما اشترطنا يعني اللي اعرفه انه قماش صالونة درجة اولى هو أفضل نوع ..يجي يمسك لك عباية ويقول هذي افضل نوع ويجلس يخربط فوق راسنا ويصكنا بذاك السعر واخرتها القماش ما كلفهم شيء لأنه قماش سيء !
يعني انا متأكدة انه في كثيرررررررررر بنات ماسكة معهم هالمبدأ وانا حتكلم من تجربتي وايش فات عليا … تضيع ع نفسها اشياء حلوة وتتوقع انه كل الانظار عليها وانه اي حركة تبدر منها رح تنزل من هيبتها او تقلل من مقامها ..بينما بالعكس هي تحط نفسها في منظر ماهو حلو ..
زي مثلا كيسة البلاستيك … منطقيا ايش فيها حاجة تفشل؟؟
او الجلسة ع الأرض اذا تعبتي من المشي ..
برضو لما تكونين عفوية وأريحية وبشوشة ..هل هذا الشيء ينزل من برستيجك ؟ لازم تكونين صنم والحواجب مرفوعة والفم ممدود واللوك مغرور عشان بس برستيجك ! ..مفتاح دخولك لقلوب الناس ..( إبتسامة ) حتى الرسول عليه الصلاة والسلام دلنا عليها قال (تبسمك في وجه أخيك لك صدقة ، وأمرك بالمعروف ونهيك عن المنكر صدقة ، وإرشادك الرجل في أرض الضلال لك صدقة ، وبصرك للرجل الرديء البصر لك صدقة ، وإماطتك الحجر والشوك والعظم عن الطريق لك صدقة ، وإفراغك من دلوك في دلو أخيك لك صدقة)
الراوي: أبو ذر الغفاري المحدث: الألباني – المصدر: صحيح الترمذي – الصفحة أو الرقم: 1956
خلاصة حكم المحدث: صحيح
..
في يوم كنت في مشغل وجالسة انتظر ..فجلسنا نحكي انا ووحدة ومعانا سعودية كوافيرة ..
وكنت مبسوطة في هذاك اليوم فكان وجهي مبتسم ع طول ..
جيتهم بعد أسبوع قالت لي الكوافيرة البنت اللي كانت جالسة معنا اول ما طلعتي قالت دخلتي قلبها ع طول ..
عرفت ليه عشان الإبتسامة ..فعلا والله انها زي الكود اللي يخلي أي انسان يتقبلك حتى لو ما قلتي أي كلمة ..
بس مو عاد تبتسمين ع كل شيء هههههه
بالنسبة لكم كقراء …إيش تشوفون حركات برستيج من البنات وتحسونها مو منطقية ؟ او في الحقيقة هي مو برستيج ولا حاجة ؟؟
